تطہیر دے ویہڑے چوں ٹر پئی ہے عون دی ماء انا للہ
نوحہ
تطہیر دے ویہڑے چوں ٹر پئی ہے عون دی ماء انا للہ
ڈٹھا ٹردا بھینڑ کوں ویہڑے وچ عباس پڑھا انا للہ
جیندی چادر دا ناں غازی ہے جیہڑی گھر دیوچ وی نیں ٹردی
کیویں ٹرسی ونج بازاراں وچ او باج ردا انا للہ
کیویں غازی صبر ڈکھیندا ہے کئی وار عباس دو ڈہدی ہے
ول چمدی ہے ویر دے بازؤں کوں ملکہ ء حیا انا للہ
اجاں ویر سلامت ہن اوندے اجاں سر تے چادر قائم ہے
ایں امن تے لوٹی پئے ویسی وچ کرب و بلا انا للہ
ہن ڈسدے سہرے قاسم دے اکھیاں دے سامنڑے مٹیاں تے
ول ڈسدی ہے اوکوں روندی ہوئی اوندی بیوہ ماء انا للہ
جڈاں صغریٰ آکھیا ول آویں میڈا اکبر دیر نہ لاویں توں
منہ چم کے عون دی ماء آکھا میڈی دھی صغریٰ انا للہ
سائر تطہیر دے ویہڑے وچ منظر ہا عین قیامت دا
جڈاں غازی سینڑ دا ناں لکھیا ول ہے لکھیا انا للہ
ارسلان علی سائر
Comments
Post a Comment