شگناں دی مہندی لا قاسم

 شگناں دی مہندی لا قاسم شگناں دی مہندی لا قاسم

ہنجوؤاں دے نال پسائی کھڑی ہے تیڈی مہندی تیڈی ماء قاسم

حسرت ہے مہندی لاونڑ دی تیکوں بچڑا سہرا پاونڑ دی 

تیڈی ہر دم خیر ہووے شالا اج سارے شگن کرا قاسم

فطرت کوں انج بدلاونڑا ہے تئیں مہندی کوں رنگ لاونڑا ہے

تیڈے خون دا رنگ چڑھسی ایں تے توں مانڑ ہیں مہندی دا قاسم

مہندی دا عجب قرینہ ہے وچ ڈسدا پاک مدینہ ہے 

ایں مہندی دے وچ ڈسدی ہے میکوں روندی ہوئی زہرا قاسم

میکوں قسم ہے امن دے کعبے دی سوہنڑا بنرا تیڈے بابے دی 

تیڈی مہندی دیوچ وسدا ہے تیڈی امڑی دا ہر ساہ قاسم 

شالا تیکوں مہندی راس آوے ایندا محشر توڑیں رنگ راہوے 

تیڈی مہندی چا کے پھوپھیاں نے ہے کیتی آپ دعا قاسم 

سائر آسی حق دا ہادی ول تھیسی قاسم دی شادی 

ول امڑی شگن مناونڑے ہن ول بڑنا ہے دولہا قاسم 

ارسلان علی سائر