میں سوچیا سی زندگی غازی تیرے سائے ہیٹھ لنگھاواں گی
نوحہ مولا شہنشاہ وفاؑ
میں سوچیا سی زندگی غازیؑ تیرے سائے ہیٹھ لنگھاواں گی
توں جاونڑ دا کنج سوچ لیا ویرن میں تاں مر جاواں گی
مینوں ٹرن دل وَل وی نیں آندا ناں پہرے دیونڑ میں جانڑاں
دس چن غازیؑ تیرے بعد کیویں میں تیرے فرض نبھاواں گی
جے ٹرنڑ دا ویر توں سوچ لیائے فیر اک احسان اے لاندا جا
اک واری مینوں بھینڑ توں سد میں تینوں ویر بُلاواں گی
میرے سر تے چادر نہ ہووے تیری لاش گوارا نیں کرنا
مینوں معاف کریں تیری لاش اتوں چپ کر کے میں لنگھ جاواں گی
جے سر تے چادر رہ گئی تاں تیرے نال اے میرا وعدہ ہے
میں اپنڑے سر دی چادر دا تینوں ویرن کفن پواواں گی
میرا ویر شبیرؑ سلامت اے جے تائیں ویر توں زندہ ایں
تیرے بعد دسا انہاں امتیاں توں میں کیویں ویر بچاواں گی
تیرے جاندیاں ای ساڈے خیماں وچ تیرے قاتلاں نے آ جانڑا اے
دس لٹ نوں میں بچوواں گی یا تینوں آ دفناواں گی
سائر اے میرا وعدہ ہے جدوں میریاں قیداں مکنڑیاں نے
چن غازیؑ قید نبھا کے میں پہلے تیری قبر تے آواں گی
شاعر اہلبیت ارسلان علی سائر
Comments
Post a Comment