اکھیں بھال اصغر کوئی کر گاہل اصغر
اکھیں بھال اصغر کوئی کر گاہل اصغر
اٹھی لعل تیکوں میں پانڑی پلاواں
میں ہنجوواں کوں تیڈا مقدر سمجھ کے
جے آکھیں تاں تیڈے لباں تے وہاواں
جڈاں پتر کوں ماء جگیندی ہے اصغر
تاں چم چم کے چہرہ اٹھیندی ہے اصغر
میں بہوں پیار کیتائے توں اکھ ناہیں کھولیندا
ڈسا تیکوں اصغر میں کیویں جگاواں
تیڈی تاں ہے نازک تے معصوم جان اے
ہے ڈاڈھا گرم کربلا دا میدان اے
توں تھک پیا ہوسیں تو آرام کر گھن
اٹھی لعل تیکوں میں ہاں نال لاواں
توں بھاویں جو جرات دا عکاس بنڑ گئیں
میڈا مانڑ ودھ گئے توں عباس بنڑ گئیں
مگر صدمہ تیڈی جدائی دا اصغر
میں ماء جو ہاں آخر میں کیویں بھلاواں
تیڈا زرد چہرہ تے کیوں کھلرے وال اے
ہے کیوں میلا چولا تے گل لال و لال اے
میں آہدی تاں رئی آں نہ ماریں وے ظالم
مگر میڈی سنڑیاں نہ کہیں وی صداواں
ہکو تیڈا جھولا بچائی کھڑی ہاں
بیا گھر دا ترکہ لٹائی کھڑی ہاں
سوچیندی کھڑی ہاں کیویں ہنڑ قبر وچ
تیکوں تپدی ریتاں دیوچ میں سماواں
تیڈا پانڑی منگنڑاں اتے خالی ولنڑاں
حشر توڑیں اصغر تیڈی ماء نیں بھلنڑاں
تیڈی خوشیاں ڈیکھے تیڈی امڑی اصغر
ایہا منگدائے سائر ہمیشہ دعاواں
شاعر اہلبیت ارسلان علی سائر
Comments
Post a Comment